作词 : Juan Ekis
作曲 : Marlon Raymond Legaspi
NAUUBUSAN NA AKO NG TUTULAAN
Nauubusan na ako ng tutulaan sa umaga.
Nakatulala na naman ako sa bintana, inuusisa
Ang mga kable ng kuryente, ang mga ibong
Pinagtsitsismisan ang mga nasaksihan nilang
Lihim na pagtataksil ng kapitbahay ko kagabi,
At ang paulit-ulit na palabas sa kalsada sa tapat
Ng bintana ng kwarto ko, nagbabakasakaling
May bago akong pwedeng pansinin. Ngunit
Mga ulap lang ang nagpapalit ng anyo,
Na ngayo'y naging mukha mo.
Nauubusan na ako ng tutulaan sa umaga
Kaya heto inaalala na naman kita
At ang lahat ng mga tulang hindi ko isinulat
Para sa iyo. Bakit ganoon? Iniisip kita
Kapag nakasusuya na ang daigdig at hindi makatula
Dahil wala nang lasa ang pag-ibig?
Tuyo kang sugat na lagi kong tinutungkab
Para lang dumugo ang alaala at magkaroon
Ng dahilan para paghilumin ng talinghaga
Ang aking mga tula. Pahihirapan ko ang sarili
Dahil nangako akong tutula tuwing umaga.
Nauubusan na ako ng tutulaan sa umaga.
Nauubusan na ako ng tula.
Nauubos na ako
Inubos kita.
At tuwing umaga, tulala ako sa bintana,
Sinusubukang buuin kang muli sa tula.

热门推荐| 1 | |
|---|---|
| 2 | |
| 3 | |
| 4 | |
| 5 | |
| 6 | |
| 7 | |
| 8 | |
| 9 | |
| 10 |